പാവങ്ങളുടെ പടത്തലവനെന്ന് അറിയപ്പെടുന്ന ഒരേയൊരു നേതാവേയുള്ളൂ, അത് എകെജിയാണ്. ജനകീയ പ്രശ്നങ്ങളിൽ ഇടപെട്ട് അവർക്കൊപ്പം തോളോടുതോൾ ചേർന്ന് അദ്ദേഹം നയിച്ച സമരങ്ങളാണ് കേരളത്തിലെ തൊഴിലാളികളെയും കർഷകരെയും സാധാരണക്കാരെയും അവകാശപ്പോരാട്ടങ്ങളുടെ പാതയിലേക്ക് നയിച്ചത്. ദുരിതമനുഭവിക്കുന്ന സകല മനുഷ്യരുടെയും മോചനം ലക്ഷ്യമിട്ട് ജീവിതാന്ത്യംവരെ പൊരുതിയ എ.കെ.ജി അതുല്യനായ സംഘാടകനും പാർലമെന്റേറിയനും പ്രാസംഗികനും പ്രക്ഷോഭകാരിയുമായിരുന്നു. ബ്രിട്ടീഷ് ഭരണത്തിലും പിൽക്കാലത്തെ കോൺഗ്രസ് നേതൃത്വത്തിലുള്ള ജനവിരുദ്ധ കേന്ദ്രസർക്കാർ ഭരണത്തിലും ഇന്ത്യയുടെ വിവിധ ഭാഗങ്ങളിൽ നടന്ന ജനകീയസമരങ്ങളിൽ എ.കെ.ജി നിർണായക പങ്കുവഹിച്ചു. താൻ കാലിടറി വീണാലും ദരിദ്രരുടെയും ഭാരം ചുമക്കുന്നവരുടെയും ഇടത്തരക്കാരുടെയും വസന്തകാലം വിരിയുകതന്നെ ചെയ്യുമെന്ന പ്രത്യാശയിലേക്ക് വിരൽചൂണ്ടിയ നേതാവ്. കേരളത്തിൻ്റെ വികസന വസന്തകാലം തുടരാൻ ഇടതുപക്ഷം ജനവിധി തേടുന്ന സവിശേഷ സന്ദർഭത്തിൽ മഹാനായ എകെജിയുടെ സ്മരണകൾ നമുക്ക് കരുത്തുപകരും.
