ചാനലുകളുടെ കിടമത്സരത്തില് വ്യാജവാര്ത്തകളുടെയും അജണ്ടവെച്ചുള്ള അസത്യപ്രചരണങ്ങളുടെയും കുത്തൊഴുക്കാണ് നടക്കുന്നത്. സാമാന്യ ഭാഷാശേഷിയുള്ളവര്ക്കുപോലും മനസ്സിലാവുന്ന ഒരു കാര്യം മനഃപൂര്വം തെറ്റായി വ്യാഖ്യാനിച്ച് സര്ക്കാരിനെ പഴിചാരാന് ഉപയോഗിക്കുകയായിരുന്നു എന്നത് വയനാടിന്റെ കാര്യത്തില് വ്യക്തമാണ്. ദുരന്താനന്തരം ലഭിക്കേണ്ടുന്ന കേന്ദ്ര സഹായം മുടക്കാനുള്ള ക്വട്ടേഷനാണോ ഇക്കൂട്ടര് ഏറ്റെടുത്തതെന്ന സംശയം സമൂഹത്തില് നിലനില്ക്കുന്നു. ഉണ്ടായ ദുരന്തത്തില് നിന്നും നാട് ഇനിയും കരകയറിയിട്ടില്ല. കേരളമൊന്നായി വയനാട്ടിനൊപ്പം ചേര്ന്ന് തിരിച്ചുവരവിനുള്ള ശ്രമത്തിലാണ്. അതിനിടയില് ചാനല് റേറ്റിങ്ങിനുവേണ്ടി ഒരു ജനതയുടെ അതിജീവനപോരാട്ടങ്ങളെ തുരങ്കം വെക്കരുതെന്നാണ് അഭ്യര്ത്ഥിക്കാനുള്ളത്.
