രണ്ടാം പിണറായി വിജയൻ സർക്കാർ നാലുവർഷം പൂർത്തിയാക്കുന്നതിന്റെ ഭാഗമായി ജില്ലകളിൽ ബഹുജനറാലി സംഘടിപ്പിക്കാൻ എൽഡിഎഫ് സംസ്ഥാന കമ്മിറ്റി തീരുമാനിച്ചു. ഏപ്രിൽ 21മുതൽ മെയ്‌ 23വരെയുള്ള ദിവസങ്ങളിലായാണ്‌ റാലികൾ. എല്ലാ റാലികളിലും മുഖ്യമന്ത്രി സ. പിണറായി വിജയൻ പങ്കെടുക്കും. എല്ലാ ഘടകകക്ഷി നേതാക്കളും റാലിയിൽ പങ്കെടുക്കും.
മൂന്നാമതും എൽഡിഎഫ് സർക്കാർ അധികാരത്തിൽ വരുമെന്നതിൽ തർക്കമില്ല. അതിനുള്ള സാഹചര്യമാണ്‌ കേരളത്തിൽ നിലവിലുള്ളത്. സർക്കാരിന്റെ വാർഷികാഘോഷ പരിപാടികൾക്ക്‌ എൽഡിഎഫ് പിന്തുണ നൽകും. റാലികൾ ബഹുജനസംഗമമാകും. സംഘാടനകാര്യങ്ങൾ തീരുമാനിക്കാൻ ജില്ലകളിൽ എൽഡിഎഫ് കമ്മിറ്റി ചേരും.
ഏപ്രിൽ ഒമ്പതിന്‌ സമ്പൂർണശുചിത്വ പ്രഖ്യാപനം നടക്കുകയാണ്‌. അതിനുമുമ്പ്‌ പഞ്ചായത്ത്‌, ബ്ലോക്ക്‌, ജില്ലാതല പ്രഖ്യാപനം നടക്കും. മാർച്ച്‌ അവസാനം വാർഡുതലംവരെ സന്നദ്ധപ്രവർത്തകരെ അണിനിരത്തി ശുചീകരണ പ്രവർത്തനം നടത്തും. സർക്കാരിനെതിരെ തുടർച്ചയായി നടക്കുന്ന ആക്രമണങ്ങൾ എൽഡിഎഫ് ഒറ്റക്കെട്ടായി നേരിടും. ജനക്ഷേമനടപടികളും വികസനപ്രവർത്തനങ്ങളും എൽഡിഎഫ് സർക്കാർ കൂടുതൽ ശക്തിപ്പെടുത്തും.
