സിപിഐ എം പൊളിറ്റ് ബ്യൂറോ പുറപ്പെടുവിക്കുന്ന പ്രസ്താവന
______________________________________
ലോക്സഭയിൽ ബിജെപി അംഗം നിഷികാന്ത് ദുബെ ‘ദേശദ്രോഹികൾ’ എന്ന് വിശേഷിപ്പിച്ച് സിപിഐ എമ്മിനും പാർടിയുടെ മുൻ ജനറൽ സെക്രട്ടറിക്കും എതിരായി നടത്തിയ പരാമർശങ്ങളെ ശക്തമായി അപലപിക്കുന്നു.
വ്യവസ്ഥാപിതമായ എല്ലാ പാർലമെന്ററി നടപടിക്രമങ്ങളും നഗ്നമായി ലംഘിച്ചാണ് ദുബെ ഈ ആരോപണം ഉന്നയിച്ചത്. ഇതു തെളിയിക്കാൻ ‘ആയിരക്കണക്കിന് ഇമെയിൽ’ ഹാജരാക്കാൻ ആഗ്രഹിക്കുന്നതായി ദുബെ പറഞ്ഞു. അത്തരം മെയിലുകൾ കൈവശമുണ്ടെങ്കിൽ അദ്ദേഹം അത് പുറത്തു വിടട്ടെ. അതുവഴി ഈ ആരോപണത്തിന്റെ പൊള്ളത്തരം വ്യക്തമാകും. ഇത് ഏറ്റുപിടിച്ച് ഒരുവിഭാഗം മാധ്യമങ്ങൾ നടത്തുന്ന അപവാദപ്രചാരണവും അപലപനീയമാണ്.
സിപിഐ എമ്മിന്റെ രാഷ്ട്രീയവും പ്രത്യയശാസ്ത്രവും തുറന്ന പുസ്തകമാണ്. ഹിന്ദുത്വ വർഗീയ ആശയത്തെ വിട്ടുവീഴ്ചയില്ലാതെ എതിർക്കുന്നത് ഇടതുപക്ഷമാണെന്ന് ബിജെപിക്ക് നന്നായി അറിയാം. അതുകൊണ്ടാണ് ഇത്തരം കുപ്രചരണങ്ങൾ നടത്തുന്നത്.
