വോട്ട്‌ ബാങ്ക്‌ നിറയ്ക്കാൻ ഭാരതരത്നപോലുള്ള പരമോന്നത ബഹുമതികളെ കേന്ദ്ര സർക്കാർ ദുരുപയോഗം ചെയ്യുകയാണ്. കർപ്പൂരി താക്കൂറിന്‌ ഭാരതരത്ന നൽകിയപ്പോൾ നിതീഷ്‌ കുമാർ ബിജെപിയിലെത്തി. ചരൺ സിങ്ങിന്‌ പുരസ്കാരം നൽകി കൊച്ചുമകൻ ജയന്ത്‌ സിങ്ങിന്റെ ആർഎൽഡിയെ ഒപ്പം നിർത്താൻ ശ്രമിക്കുന്നു. കർഷക പ്രക്ഷോഭത്തിൽ പങ്കാളികളായ കർഷകരെ സന്തോഷിപ്പിക്കാമെന്ന ലക്ഷ്യത്തോടെയാണ്‌ എം എസ് സ്വാമിനാഥന്‌ നൽകിയത്‌.
ഹിന്ദുത്വവാദം ആർഎസ്‌എസിന്റെയും ബിജെപിയുടെയും രാഷ്‌ട്രീയ പദ്ധതി മാത്രമാണ്‌. അതുകൊണ്ട്‌, അയോധ്യാ ക്ഷേത്രപ്രതിഷ്‌ഠ രാജ്യത്തിന്‌ നാഴികക്കല്ലല്ല, അതിനുമുമ്പും പിമ്പുമുള്ള ഇന്ത്യ സമാനവുമാണ്‌. കുറ്റം തെളിയുന്നതുവരെ നിരപരാധിയായി തുടരാൻ എല്ലാവർക്കും അവകാശമുണ്ടെങ്കിലും, ഇപ്പോഴത്‌ നിരപരാധിയാണെന്ന്‌ തെളിയിക്കുംവരെ കുറ്റക്കാരനാകുന്ന സ്ഥിതിയായി. പരമോന്നത കോടതിയുടെ വിധികൾ ആ നിലവാരത്തിനൊത്ത്‌ ഉയരുന്നുണ്ടോ എന്നത്‌ ചർച്ച ചെയ്യണം. ചീഫ്‌ ജസ്റ്റിസിനോടും ജഡ്‌ജിമാരോടും അത്‌ അഭ്യർഥിക്കാനേ കഴിയൂ. ബിജെപി ഇതര സംസ്ഥാനങ്ങളിൽ ഗവർണർമാർ ജനാധിപത്യ അധികാര പരിധി വിട്ടാണ്‌ പ്രവർത്തിക്കുന്നത്‌. ബിജെപിയെയും നരേന്ദ്ര മോദിയെയും അധികാരത്തിൽനിന്ന്‌ മാറ്റിനിർത്തിവേണം മാറ്റം ആരംഭിക്കാൻ.
